Hikmet-21

Asi câfi kulung keldi dergâhingge Kolum tutub yolğa salgıl "Ente'l-Hâdi" Erklik Kadir yığlab keldim bârgahingge Kolum tutub yolğa salgıl "Ente'l-Hâdi" Tün keçeler tang atkunça yatmak işim Seher turub râz etmedi mungluğ başım Nedâmetde akar mukin közde yaşım Kolum tutub yolğa salgıl "Ente'l-Hâdi" Yolsuz yolğa kirdim dostlar halim harab Halkdın sorsam heç kim bermes menge cevab Halıkımsen yol körsetgil âlicenâb Kolum tutub yolğa salgıl "Ente'l-Hâdi" Hıcâletde korkub keldim günahımdın Zâtı uluğ perverdigar ilâhımdın Nidâ keldi "Nevmid koymay dergâhimdin" Kolum tutub yolğa salgıl "Ente'l-Hâdi" Yığlab keldim Hazretingge eyâ şâhım Kabsab keldi karanğulık çıkkıl mâhım Padşahimsen Bir ü Bârım tekyegâhım Kolum tutub yolğa salgıl "Ente'l-Hâdi" Başdın ayağ boldı günah kayda baray Yol adaşgan itdek bolup kimdin soray Bu hâl birle didarıngnı kaydın körey Kolum tutub yolğa salgıl "Ente'l-Hâdi" Men berkitsem elk-ayak cümle güvah Rahmet etib sen keçmeseng halim tebah Şermendemen dermandemen köbtür günah Kolum tutub yolğa salgıl "Ente'l-Hâdi" Günah derdi bimâr kıldı tabibimsen Mahbubumsen dermanımsen habibimsen Yolda kaldım halim sorar refikimsen Kolum tutub yolğa salgıl "Ente'l-Hâdi" Fasık facir rahmetingdin nevmid emes Sendin özge heç kim meni yolğa salmas Lutf etmeseng müşküllerim âsân bolmas Kolum tutub yolğa salgıl "Ente'l-Hâdi" Heç kişi yok yerde kökde sensen Kadir Şekkim yoktur bu sözümde özüng nazır Hem yekkesen yeganesen bişek hazır Kolum tutub yolğa salgıl "Ente'l-Hâdi" Men yolungda baş bermedim Kadir Hüda Baş ne bolğay ğarib canım yüzming feda Derd hem özüng derman özüng lutfung deva Kolum tutub yolğa salgıl "Ente'l-Hâdi" Can u iman ğızasıdur seni zevking Canım berip satkun alay seni ışkıng Roz-ı mahşer şefi bolğay seni şevking Kolum tutub yolğa salgıl "Ente'l-Hâdi" "Kul Huvallah Sübhan Allah" din kamçısı Roze namaz tesbih tehlil Hakk elçisi Pir-i muğan taliplerini yol başçısı Kolum tutub yolğa salgıl "Ente'l-Hâdi" "Ente'l-Hâdi Ente'l-Hakk" nı zikrin aytsam Hadi bolsang egri yoldın rastka kaytsam Hû zikrini tilge alıb na'ra tartsam Kolum tutub yolğa salgıl "Ente'l-Hâdi" "Ente'l-Hâdi Ente'l-Hakk"nı zikri kavi Pir-i muğan sözleridin alsa fetvi Batınları revşen bolup bolur yahşi Kolum tutub yolğa salgıl "Ente'l-Hâdi" Kul Hâce Ahmed rahmetingdin ümit tutay Hacem meni bendem dese şükrin etey Bendem demey yüz ögürse neçük aytay Kolum tutub yolğa salgıl "Ente'l-Hâdi"