Hikmet-82

Hakk'a yanıp mü'min bolsang tâat kılğıl Tâat kılğan Hak didârın körer dostlar Yüz ming belâ başka tüşse ingremegil Andın songra ışk sırrını bilür dostlar Aşıkları zâr ingreben yolğa kirdi Her ne cefâ tegse anı Hakdın bildi Râzı bolup yer astığa hâzır boldı Zâr yığlaban seherlerde kobar dostlar. Eyâ dostlar hiç bilmedim men yolumnı Saâdetge bağlamadım men belimni Gıybet sözdin hiç yığmadım men tilimni Nâdârılıgım meni resvâ kılur dostlar Keçe kündüz bi-gam yürdüm zikrin aytmay Cehd eyleben tüni küni fikrin etmey Muhabbetni bâzârıda özni satmay Nefsim meni yüz ming taâm tiler dostlar Nefsingni sen öz re'yige koyma zinhâr Yemey içmey tâat birle bolğıl bidâr Ahir bir kün körsetgüsi senge didâr Bidâr bolğan anda didâr körer dostlar Eyâ gafil Hak zikrini tildin koyma Dünyâlıkdın bir zerreni kolğa alma Erenlerni arkasıdın hergiz kalma Yolğa kirgen âhir murâd tapar dostlar Vâ deriğâ ermân birle ömrüm keçti Nefsim meni tuğyan kıldı haddın aştı Cânım kuşı pervâz kılsa rûhum kaçtı Gafil yürgen ömrin yelge satar dostlar Didâr körey degen kullar bidâr bolur Yürse-tursa, yatsa-kobsa zikrin aytur İçi taşı andağ kulnı nurğa tolur Allah nurın andağ kulğa saçar dostlar Arif aşık öz canını otka yakmas Biderdlerge çakmakın yakıp çakmas Dünya kelip cilve kılsa kıya bakmas Işksız kişi behayındın beter dostlar Kul Hâce Ahmed bende bolsang yığlab yürgil Muhabbetni meclisige özüng urgıl Kıyâmetni şiddetidin mâtem kurgıl Mâtem kurğan sırdın haber alar dostlar