Bir Herem-dîdeden Bir Nev-demîdeye

Bir Heremdîdeden Bir Nevdemîdeye Olmaz mı bir mutâli'i en sâf bir melek En köhne seng-i lahde düşen bir kitabenin? Enkâz içinde gizil kalan bir harabenin En eski revzeninde açılmaz mı bir çiçek? Bende sinîn içinde kalan bir harabeyim Elbette isterim bulayım taze bir çiçek Mümkünmi bence şi'r-i musaffâyı sevmemek Ben kim mezâr-ı ezminede bir kitâbeyim Ey şûh! sen o şi'r-i musaffa degilmisin? Kim bende olmasun sana şiddetle irtibat? Şâyân degilmi bir güle pejmürde bîsat? Ey mâh! Sen o zühre-i zahire degilmisin? Sen tatlı bir terâne, ben âsude bir gece, Ben yâdigâr-ı köhne, sen ümid-i nevzuhûr Müstakbeli hayâl ile istedikce sen gurur Ben aglarum hayâl ile mazîyi gizlice Altun saçınla lihye'i sîminimi benim Mezc iylesemde ey meh-i lebriz-i ihtişam! 'alemde ictima-ı meziyyât-ı subh u şâm Bizde tahakkuk iylesem olmazmı gültenim? Beni sende mâ mezâma nazar eyleyim hemân; Sen bende gör netâyic-i müstakbeli madem; Görsün; bizi görübde pür âmâl ü pür garâm Bir yirde mâ mezâ ile müstakbeli cihân Ey rûh, nihâl-i hayât-ı pür âb ü tâb! Gönlümde hâbnûş olan en tatlı hatırât Dest-i nevâzişinle bulub taze bir hayât Tekrar 'avdet eyleyecekdir bana şebâb! Sevmek şebâbı bence tabi' degilmidir? Sevdim anın içün seni ey gonca-i şebâb! Ben itmek istesem seni sevmekden ictinâb Sevmekde, sevmemekde gönül müstakilmidir? Bir sevmek üzere halk olunan bî-günâh dil Seksen yaşında müncezib olsun bir âfete! Layık degilmi sevdicegim lütf u şefkate Berf-i herem içinde kala rûh-ı müştail Düşdüm diz üsti karşına seksen yaşında ben Sen on sekiz yaşındaki destinle ey perî Kaldır beni; vücuduma öpdürme yerleri Kalsun revâmı yerde sana hürmet eyleyen? Cenab Şehâbeddin