Gazel (Dil ü cânımda inler dâim efkâr ü hayâlâtım)

Gazel Dil ü cânımda inler dâim efkâr ü hayâlâtım Şifâsız hasta-i ye's ü elemdir ihtisâsâtım Serâpâ ra'şedar olmakta magzım her tasavvurdan Bütün 'âsabımı pür lerze eyler infi'âlâtım Niçün bilmem nazargâhımda mugberdir bütün eşya Niçün mestûr-ı jeng-i gussadır mirsâd u mir'âtım Niçün endîşe-i endûhnâkimden akar âlâm Niçin alûde-i zehr ü kederdir ibtisâmâtım Cihanda bir heves, bir arzû bir iştiyâk olmaz Ki olsun bâis-i şevk-i dil-i pür iktirâbâtım Olur fikr-i gamâbâdım gibi pûşîde-i hırmân Benim rûh-ı melûlümden dogan âmâl ü niyyâtım Samîm-i kalb-i mecrûhum iken mehd-i tecellîsi Garîk-i rahm u şefkat olmasın mı hep sünûhâtım Hem aglar hem yazar hem yazdığımdan aglarım kendim Gider birlikte dem-i igbirârımla makâlâtım Benim herzâde-i tab'ımda matbû u hüveydâdır Bu hissiyât-ı şebrengim, bu nevmîdâne hâlâtım. Cenab Şahabeddin